شمروخ الأراجوز 41
شكشكة شعريه غير دورية بالفصحي العامية
السنة الرابعة 2006
لايحق لنا ما ى يحق لأهلنا
طوبة – ذي الحجة – يناير


كلام بسيط في السياسة

حاميها حراميها
حلمت بليالي النعيم اللي جايه في يوم يبقي لص المدينه حاميها
فتصبح جميع المسالك خفيه .. وتطفح جميع المهالك عليها
وتطرح غيطانها بلاوي عصيه .. فضايح تعري الخفايا الكريهة
تضيع عقول المدينة الذكية . فتصبح ضحية لعقولها السفيهه
وينشق قلب الولاد الفتيه .. في أيد الجهول اللي قطع إيديها
فبعجر يفسر غموض القضية . يرقص حواجبه عشان يفتي فيها
ومبعر يخطط خطط عبقرية . يبيع لحم اهله اللي يمشي عليها
عميل العدو يضربوا له التحية . ولص الخزن يبقي حارس عليها
يموت الأمل في قلوب الرعية .. وتورم قلوبها وتعمي عينها
ولاصطبل يصبح دواير سنيه .. حمير الحصاوي تفتش عليها
بغالها تغني لحياتها الهنيه .. عيالها تبيعها لمين يشتريها
يشيب الرضيع جوه بطن الوليه . يضيع الشهيد اللي راح يفتديها
يابخته اللي قال كلمته العبقرية . قول الحمير لا تراهن عليها
وجحش إما يعلا النهاية جليه .. يدك الزرايب علي ساكنيها

المدمن
أنا مش غراب
انا أبو القردان
ممنوع قانونا
تصطادني
طرطور وصوت
ملكوت فنان
بس الفلس متقصدني
رأسي برأس
أجدع سلطان
ملوك وزعما
بتحسدني
لذا ف جميع
كافة أوطان
زنزان سجونها
اتعودني
أراجوزات مصرية
في بلاد الزمة الرحبة تلقي قانونا الورث كويس
إبن القحبة يطلع قحبة وإبن الريس ينزل ريس

الأراجوزات النوزي
أنا الأراجوز النوزي
لامنتهز ولا مهزوزي
أنا الذي يوم العوزه
تلاقيني مطرح ما تعوزي
لو عزتي قمره أقطفها لك
لو بيني وما بينها مهالك
عفيف أنا ومش متخفف
م الهموم اللي في بالك
وضحكتك فيها كفايتي
وقلبي علي طرف عصايتي
نكدي صيحيح لكني شريف
وبطني علي قد جرايتي
أنا اليتيم من يومي
مش إبن حنت ولا فاجومي
بادق علي طبل الاودان
... لتنعسي وتنسي وتقومي
جاي لك علي لحمة بطني
وهبت لك شاشي وقطني
لو تأمرني ف حبك أموت
... ولا اللصوص تستعبطتي
قومي أنفضي لحاف الوخمة
إتحرري من دي اللخمة
الكون بيلعب بالصواريخ
.. وغرقتي في الكدبة الفخمه
خفي مع العصر تعومي
دانا اللي فاقسك من يومي
بتزوري برغيف لزور
..ولما بتجوعي تصومي
صعيدية والا دقهلية
النيل سقاك دم ومية
والويل رماك علي سود ليام
... تكفيكي لقمة وجلابية
والبأف يطلع بيها والعه
يبلعها نازله او طالعه
وأنتي اللي بتقيدي الكوانين
...وتبني لعساكره القلعة
عشان كدة جيت بعصايتي
علي الدماغ لو مافهمتي
دي دمعتك غالية عليه
.. وضحكة أولادك غايتي
واغلي منها أن تفوقي
دانا شويت قلبي ف شوقي
مستنس مع بعض نخطي
... البسك توب علي زوقي
وإن معجبشي أنامش زعلان
رجب أكيد سابق شعبان
فاختاري خيرتك علي كيفك
..بشرط ما نبيعش الفدان
ولا نندين لزعيط ومعيط
ولا للملاهي نبيع الغيط
دا الحلم يامه سهل بسيط
وطن علي قده وإنسان

أراجوزات مصرية

عاشق ولهان
اراجوز فقير
كلح وفلاح
حزني
منسب لجدودي
قلبي أتملا في العشق
جراح
والحظ
ضيق لي حدودي
ضحكت
ع التركي السفاح
فتلي من شنبه
قيودي
رميت حمولي
ع التفاح
حبيبتي
لهفت مجهوري

أنت غبن مين يافتي ما عدش في الناس أصول
حتي الشتا مش شتا من غير مطر موحول

أخر حدود الزجل
سلت ملت
حرة بلدنا أكم فيها بشر حرين
وان كنت مانتش مصدق
أنظر وحقق .. تلاقينا يسار ويمين
متزبطين زبط فوق الخط شرعيين
إثبت حداك أننا من دون جميع الناس
نقدر نخطي بقدم ..يا ننط ع الاتنين
حرين هتاف نهتفوا .. بنسقفوا بكفين
ويجوز نبصبص بعين واحدة يا بالعنتين
دي بلدنا حرة وأحنا من الاذل حريين

أنا حر أنم سلت ملت
أفتح شبابيكي أو أقفلها بترابس
وأن سيبت شبرا علي كيفي أروح عابدين
دي بلدنا حره وأحنا بعزمها حرين
حرين نسمي عيالنا زي ما عايزين
إن كنا من القبط ح نسمي موريس يا حنين
وإن كنا م المسلمين نختار حسن يا حسين
ومادام صالحنا ولاد العم ياخلتي
نقدر نسمي إذا عزنا شاريت وكوهين
دي بلدنا حرة .. وأحنا بمجدها حرين

عندك انا حر أبرم شنبي لو عايز
وإن عزت أخلف قبيلة كل شىء جايز
أنا لية شرعا قانونا أربع نساوين
دي بلدنا حرة وأحنا بشرعها حرين
ح نحب جايز سعاد حسني يا يحيي شاهين
ونغمي أهل الهوي يمكن او اشكي لمين؟
ونشجع الأهلي أو نبقي زملهيين
عشان دي حره بلدنا واهلها حرين
واللي ح يزهق م الحرية بيسافر
وإن عاز يهاجر يلم عزاله ويهاجر
وأنا حر ح أفضل عشان أخر الفلس والعين
علشان ما تفضل بلدنا وأهلها حريين

حره بلدنا مادام فوق راسها راجل حر
ح ينقل البحر بالغربال بدون ما يخر
كل ما ينفعنا عارفه وعارف اللي يضر
ومزاجه ما أحلي مزاجه وقريا للي تقر
الكل دايما معاه لا تقول يسار ويمين
وأسال ؟ وقولي بقي مين زينا حرين؟
مش راح تلاقي دي حتي الحره أمريكا
شهدت لنا أننا مخزن بوليتيكا
وشهد رئيسهم ودق الطبل مزيكا
وقال كفي من الجفا وصبحت لنا شريكه
وبعت لنا الخردة إف الخمسة في عنيكا
وحتي لو خردة أية ح يضر يا ويكا؟
داحنا دهنا في الهوا في الكامب شيكا بيكا
صبحنا راسنا براسهم .. يضحكوا علي مين؟
الخيط في أيدهم صحيح والخية رجلينا
لكن إرادتنا حرة .. وأحنا ياحدق حرين
من دقة الباب بنعرف الي خبط مين

في حب مصر
الوجع
مصر أهلا من أنهاردة
فوقوا من دون البشر!
إيدكوا ليه في مية باردة
د الجنون صاب البقر

نفسي نكره مصر حبه ياجدع
مصر الحزينه الضحكة .. أم البدع
المملوكية العثمانية أمات هدوم هلاهيل رقع
نكره زفاف النيل وتعطين الترع
خرابات حجارة لا رصفه
لون لارغفه
هتافات جماعها اللي مقشفها الحفا-
وبتفتدي بالروح وبالدم اللي داسها وأرتفع.
نفسي نكره مصر حبة ياجدع
نكره أكوام الزبالة اللي كرهت نفسها
المكاتب اللي فقدت حسها
الخديعة اللي يوماتي نشمها
في المقالات السياسية فب مجلات الادب
كدب لون الحبر فب كل الخطب
رعب خرابيش ميكرفون الوعظ-
في نصاص الليالي
غلب أهل السوق وأسعار السلع

نفسي نكره مصر حبة ياجدع
الهدوم الباله بتارين النواصي
رقص نساوين المعاصي
ذمة الخلق المخاصي
عقدة النقص اللي في الشاويش عطيه
مخبرين الفردة وشيوخ البراطيل الخفية
العصور الوسطي غلمان الجواري –
في قصور المريوطية
أهة الذل اللي زي الحمي ماشي
في مصارين القري وعزب المناشي
دمل المجد القديم اللي أنفقع
ياللا نكره مصر ياجدع
نكره الجلد التخين والعنطزة
فهلوه وفقر وحداقة وفنطزة
توهة الحق ف أدين حزب المسيرة الملغزة
عمرنا المسفوح علي دكك السياسة الشعوذة
يا مصاروة مسلمين والا قبط
بطلوا قعر وعبط
إقطعوا لسان الدجل والنأوزة
كان زمان كنا كذا-
انهاردة انتوا ايه؟ انتو مين؟
في الكاسيتات الرداوي في أستمارات الجزا
ع الشاشات او في فصول التلميذة
ع الرصيف نايمين سنين في إنتظار
يعبر الفرعون نقرقش له الزلط
فيها أيه؟ لو مرة نكره مصر يا لبط
لما تمشي بكيفها في السكك الخراب
واما تفتي بالهبل-
خرم إبرة تعدي منه ميت جمل
تنقل البحر المحيط بالكستبان
ورمال الصحرا بالفنجان والقفه الجبل
تفتح الأبواب بإيدها للكلاب
وأما بتصدق وشايفة الكدبة زي الشمس
واضحة بلا خجل
كل نايبة خايبه دنيا وىخرة فيها معجزة
كل وكسة ناكسة كان ريحها معاكسة بلا أمل
إنما تقبلفب أولادها العزا- وعلي عجل-
تنسي وتلملم جروحهاوترمي روحها-
تحت كعب الندل-
وتسامح قليل الأصل والفسل واللكع

نفسي نكره مصر مرة ياجدع
نفهم ان الحب أحيانا مرض
عند بعض الناس غرض
واكيد في معظم الأحيان وجع
خاصة لما يبقي دق طبلة
وكلام طق الحنك
لت عجن وجعجعة .. مية ف شبك
ودان حمير بلا سمع
يبقي أشرف لو كرهنا بعض حبة ياجدع
وخلعنا بقسوة كل الأقنعة
اللي راسمة الأبتسامة في وشنا
وأعترافنا بغشنا لبعضنا
بقلة القيمة اللي كسرت نفسنا
لو فهمنا الفرق بين الحمار والبردعة
ندخل أقسام البوليس بقدنا
ونقف قصاد العسكري وأبن الحكومة بحقنا
نغسل زواق الكدب يو عن جلدنا
ينكشف زيف الوشوش المدهنة اللي بذل
الحاجة صابحة من القلق متبقعة ومتلونة

ياريتنا نكره مصر حبه جدعنه
نكره حضور المهرجانات واللجان البعبعة
نكرة معملة المجاملة أردغان البرطعة
زيطة علوم الزمبليطة المفجعة
ونعترف
إن كله فشنك رغم الفرقعة
مية راكدة ..حس ميت عقل بايش
في أدمغة متفرقعة
والوطن مقهور ومكسور قلبة يرعي في النفاية
من أيدين أبن الجهول والإمعة
اللي مهما نكرتذنبه بالقبول
لابد ح يجرك معه
يرفعك لما توافقه فيسمعك
يقنعك ساعة تنافقه باسم أمجاد الوطن
بيجوعك كي تتبعه
تنشد وراه مبسوط نقوط او مجدعة
فرحان يترقص لجل رقعة خوفو بعدما مات
ح يورث منقرع

يلزمنا نكره مصر حبة ياجدع
يمكن يروق الحال فيرضي عنا رأس المال
ونخرج من هباب المعمعة
نطلع بأقل خسارة-
من ضرس الليالي الفاجعة

يرجعوا النسوان نسا
يرجعوا الرجال رجال للعوزه مش للمنفعة
يزرعوا الوزر شجر يطرح ثمر-
مش بيبيعوا المزرعة
ويحلموا بالارض تاني الفلاحين مش بالسفر
وأساتذة الجامعة الجهابزة
يبطلوا شغل الغفر
ولا يخافوش أولادنا من لون الخيار
ولا فتة الملوخية من دهن البقر
نحكي حواديت العفاريت للصغار
ترجع الخبار تبشر بالخير
نزل في مواعيده المطر
زال الخطر
الأنسانية تسترد وعيها
فتميز العمال عن الصيع
وأهل الجهل عن اهل النظر
وفيران صحاري القحط عن جنس البشر
المدنه ترجع للأدان
والغنوه للودان
والسهره للقمر
يقدروا زعماءنا قيمة الكتاب
ويسألوا جداول الحساب
ولا يوشوشوا الدكر ولا يضربوا ودع

فتعالوا نكره مصر حبة ياجدع
نعلن بكل شجاعة جهلنا وجهلها
وذلها بأهلها
وغلبها وغلبنا وكدبنا وكدبها
نكسر أيدين كل اللي يكسر قلبها
نقطع لسان اللي يزيف صوتها يكتم حسها
واللي بيسرق عيني عينك لقمة الأيتام
ويقطع للغريب من لحمها
يمكن مع اليام - إذا ما حزننا يزيد-
يكيد ويفري ف قلبها الحديد
نرجع ونستعيد القدرة ان نحبها
نشيد وطني
تعيشي يا مصر منصورة في مدينة نصر
وصدفه تلوني بكره بحبر العصر
تعيشي يامصر
في صالة المتحف الكبري وقاعة لاحتفاليات
تعيشي ف حفلة الاوبرا واحزاب التلات ورقات
في دقة كعب رقاصات بلاد بره
ومنشيتات صحف شبرا
وأغنيات بنات الملجأاليتما ليوم النصر
تعيشي يامصر
ويعلا صوتك الجمهوري في الاستاد
هتاف تترج له الدنيا يهز العرش
لاهايب ولا خواف
غلبنا بوركينا فاسو أخدنا الكاس
في زفه تلم كل الناس
يعلوا رايتك الغندورة فوق القصر
تعيشي يامصر
تعيشي يامصر ياحرة في قناة النيل
وفي السابعةوفي الثامنة
وفي حداشر قناة وسبيل
تعيشي كل يوم مشروع ورا مشروع
يطب القفا ع الموضوع ، فلا تحسي الآم الجوع
ولا الموت الفجائي ف قطر قلة حيل
ولا القاعدة في وسط عيالك القاعدة من الاشغال
ولا عجز الرجال بليل يحلو عقدة التطبيع
فيبقوا في أفتتاح دايم وطبل وزمر
تعيشي يامصر.. بوابة علي الثقافات
تباعي الدنيا بآثارك وتتحديها بالأموات
فداكي جيل ضحية لقلة النصغه وجبل أسفه
وجيل من قلة الهمة هرس كام جيل
وجيل تطجين وجيل تطبيل وجيل عاجز عن المواويل
ووجيل من يأسه أتكفت بطوا الصبر
تعيشي يامصر
تعيشي يامصر .. وتواصلي خطي الانجاز
قري سياحية ومصانع بلاط سيراميك
مدن راحة لارباب البنوك والجاز
ومهرجانات ومؤتمرات وندوات للأدب والفن
عجين فلاحة نومة الطزبة بيض الديك
هبل شعبي ورقص ورغي ع الشاشات لوش الفجر
تعيشي يامصر
تعيشي وتبقي تفتكري
غنايا الماسخ الفقري
وشعري اللي ماهوش شايف غير رجلين بلا رصفان
وطفح مجاري وعيال حافيه
وولايا بدقون جديان
جتت مرصوصة ع القهوة شيش بتوزع السرطان
صعايدة من بواقي السد باقفاص البلح صبيان
شباب بايت وافنديةبلا ميزة وبنات نسوان
وجوع بيصهلل السهرة في حي الروم
وجوه لمدرسة الميري يدبل زهرة الأوطان
يكره قلمي ف شعري
ويسرق عمري من عمري- بلاده وقهر
تعيشي يا مصر
لكن حسك في يوم تنسيني انا الشاعر
سليل الفقها والحرافيش
وانغار العهدسخره وخدم الجيش
وسكان المدن تطفح مدن للخيش
وعمال الورش والفلح والدراويش
وكل اللي أنتي دايساهم بحبك تحت خط الفقر
وبرضة يموتوا ويغنوا وهمه بصدق يتمنوا
تعيشي يا مصر

فؤاد قاعود .. وداعا
مين اللي في المضيفة
قالوا الجميل شاعر
برغم طبع الجفا
ديوانه كان سامر
حضن الجميع بالوفا
وبالحق كان قادر
سبيل وينبوع وفا
وبالحق كان قادر
سبيل وينبوع صفا
لكل طيف عابر
عطشان سبيل وأكتفي
بشعره فيض هادر

الموت صديق الغلابة في بلا ابها التلف
نهشت قلوبها الديابة مجاريها طفحت قرف


فزورة حكاية الواد خدام
النسخة الزفره من صدام
راجع بعدين تلاتين أعوام
شفط ولهط ولت كلام
تشنسع ترويع تجويع غعدام
تقطيع تقاليع الورا قدام
وكأنه مكانش من الحكام
يكتب ويفبرك ف أفلام
يلحس جزمة سيدة اما ينام
ويكون له في ساعة الحظ مدام
يحكيله يطير بيه في الأحلام
سوا يعجنوا سم في بلاد الشام



تخاريف الصفحة الأخيرة
إذا كداب الزفة ح يخجل
واللص يقول دا حرام
وإذا معدوم الزمة ح يعقل
ويبطل تحاليل وكلام
وإذا الندل العجل التنبل
يفهم ليه خايبه الأحلام
إذاغفير العمدة الأهبل
يوعظه دوران الأيام
يبقي حرامي السلطة ح يرحل
حتي إن لجمت امه مدام
والجماهير التايهه ح تسأل
مين مخرج تلك الأفلام؟!







عايز أيه يابني ياسمير
مانت كتبت عزفت كتير
لسه فحيلك تكتب أيه؟
مصر إنهطلت جلدها نحس
صاحية تهبل نايمة تهطرس
هطلوها بفرافيت العيش
سطلوها بخطب وحشيش
مش بتحوق فيها شماريخ
مش ح يحليها غير صواريخ
وضحايا وشهدا وضمير
يومها ح تنحل الفوازير

يوماتي بأحلم اموت صاحي وكاره انام
أصل الئيم عكروت قارفني في الأحلام






ندوة فؤاد قاعود فى رامتان


توفيق زياد وسمير عبد الباقى